Luljeta Berisha, motra e ish-kreut të Bandës së Durrësit Lulzim Berisha, ka kallëzuar penalisht drejtorin e Agjensisë Shtetërore të Kadastrës Durrës dhe përgjegjësen e sektorit, Albana Gjoni.
Sipas Berishës, këta persona kanë vendosur në emrin e saj disa prona që ajo nuk i posedon dhe se informacioni që i është dërguar OFL-së ka qenë “i falsifikuar”.
Më tej ajo shton se lajmi i publikuar nga mediat lidhur me pronat që zotëron i vëllai nuk është i vërtetë, pasi Kadastra e Durrësit ka përgënjeshtruar veten, duke saktësuar se pronat nuk janë të familjes Berisha.
Kujtojmë se Lulzim Berisha është ndër personat e parë që është shënjestruar nga OFL dhe njihet si një nga emrat më famëkeq të botës së krimit, pasi akuzohet për një sërë veprash penale, duke filluar nga vrasja, trafik droge, trafik qëniesh njerëzore.
Ai u arrestua më 6 prill të 2006-ës dhe qëndroi në burg 10 vjet e 8 muaj burg ndonëse fillimisht ai u dënua me burgim të përjetshëm, por pas një kalvari të gjatë proceses gjyqësore, ai la qelinë në 5 dhjetor të 2016-ës, kur i kishin mbetur edhe 5 vite burg.
Berishës iu ul dënimi nga burgim i përjetshëm në 25 vite dhe më pas duke përfituar nga ulja e dënimit dhe aministitë, ai doli nga burgu.
Ndërkohë ai për 5 vite duhej të paraqitej në shërbimin e provës dhe nuk duhet të kryente vepra kriminale.
Në këtë çështje është përfshirë edhe ish-kryebashkiaku i Durrësit, Vangjush Dako i cili ka lëshuar një karakteristikë familjare për Berishën, për të vërtetuar se është i gatshëm për t’u riintegruar në shoqëri.
Gjykata e Apelit në vendimin për lirimin e Berishës mori parasysh edhe faktin se gjendja e tij psikologjike ishte rënduar së tepërmi, kishte shfaqur pendesë dhe kishte dy prindër të sëmurë rëndë, që jetojnë vetëm.
