Bjellorusia ka liruar gazetarin Roman Protasevich dhe të dashurën e tij, Sofia Sapega. Gazetari kritik, i cili u arrestua në avion, është lënë tashmë në “arrest shtëpie”, ka konfirmuar babai i tij për BBC. Protasevich u mor në paraburgim i akuzuar për nxitje së trazirave.
Bashkë me të, pas urdhrit të Aleksandër Lukashenko për të devijuar fluturimin e avionit Athinë-Vilnius për ta detyruar më pas të ulej me detyrim në Minsk u arrestua edhe e dashura e tij, shtetasja ruse Sofia Sapega. Edhe për këtë të fundit është dhënë masa “arrest shtëpie”.
Arrestimi i tyre solli reagime të ashpra. BE vendosi sanksione ndaj ndaj Bjellorusisë. Duket se Bjellorusia është “dorëzuar” pas presioneve dhe ka nxjerrë gazetarin nga qelia. Por si u arrestua Protasevich?
Roman Protasevich, 26 vjeç, u arrestua në aeroportin e Minsk më 24 maj. Bjellorusia ngriti një avion luftarak në ajër për të detyruar aeroplanin, i cili po udhëtonte nga Greqia në Lituani, të ulej në kryeqytetin bjellorus me pretendimin e kërcënimit për bombë. Policia arrestoi z. Protasevich kur zbritën pasagjerët.
Sekretari i Jashtëm, Dominic Raab, u tha deputetëve se përgjimi ishte një sulm tronditës ndaj aviacionit civil dhe një sulm ndaj ligjit ndërkombëtar. Raab shtoi se sanksionet e mëtejshme po konsideroheshin kundër regjimit të Presidentit bjellorus Alexander Lukashenko dhe se ambasadori i vendit në Londër ishte thirrur në mënyrë që Britania e Madhe të mund të përcillte “dënimin e këtyre akteve”.
