Rreth 761 organizata joqeveritare dhe grupe humanitare nga e gjithë bota kanë bërë një thirrje të përbashkët për veprim urgjent në Rripin e Gazës, duke kërkuar ndërprerjen e asaj që e përshkruajnë si “uri e shkaktuar nga njeriu”.
Ato i bëjnë apel bashkësisë ndërkombëtare që të ndërhyjë përmes një konvoji humanitar diplomatik dhe të çajë rrethimin izraelit përmes pikës kufitare të Rafah-ut.
Kjo nismë u lançua më 12 maj nga organizata të shoqërisë civile palestineze dhe brenda 24 orëve mori mbështetjen e mbi 300 entiteteve, përfshirë Human Rights Watch dhe organizata të tjera me peshë globale.
Në tekstin e apelit, kërkohet që shtetet të marrin pjesë në këtë ndërhyrje duke dërguar delegacione zyrtare në nivelet më të larta, për të shoqëruar kamionët e ndihmave që ndodhen në pritje pranë kufirit me Gazën.
“Ky veprim është një detyrim ligjor ndërkombëtar, por mbi të gjitha është një çështje guximi moral dhe solidariteti njerëzor,” theksohet në deklaratë.
