Turqia ka bërë të ditur se po mbyll hapësirën ajrore për avionët civilë dhe ushtarakë rusë që kanë si destinacion Sirinë.
Këtë informacion e ka dhënë ministri i jashtëm turk Mevlut Cavusoglu, i cili tha se ndalimi do të qëndrojë në fuqi për tre muaj.
Turqia, një anëtare e NATO-s, gjithashtu ka marrëdhënie të mira me Rusinë dhe Ukrainën dhe po përpiqet të ndërmjetësojë negociatat midis dy palëve.
“Ne kemi mbyllur hapësirën ajrore për avionët ushtarakë rusë, por edhe fluturimet civile që transportojnë ushtarë në Siri”, tha Cavusoglu.
Rusia është një nga aleatët kryesorë të regjimit të Presidentit sirian Bashar al-Assad, të cilin e ndihmoi të qëndrojë në pushtet pas shpërthimit të luftës në Siri në vitin 2011.
Më herët presidenti i Turqisë, Recep Tayyip Erdogan, ka hedhur poshtë veprimin ushtarak të Rusisë ndaj Ukrainës, duke e quajtur atë “të papranueshëm”.
“Ky hap, të cilin ne e shohim si në kundërshtim me të drejtën ndërkombëtare, është një goditje për stabilitetin dhe paqen rajonale. Na vjen sinqerisht keq që Rusia dhe Ukraina, të cilat i shohim të dyja si vende mike dhe që kemi marrëdhënie të ngushta politike dhe sociale, janë përballur në këtë mënyrë. Ne do të bëjmë pjesën tonë për të garantuar sigurinë e të gjithëve që jetojnë në Ukrainë, veçanërisht qytetarëve tanë dhe vëllezërve në rajon”, është shprehur Erdogan.
