Ministri i Brendshëm Bledi Çuçi ka thënë se SHÇBA e bën punën e saj para ligjit dhe ka kërkuar nga mediat të mos merren me këtë çështje. Pavarësisht se ky institucion është thuajse jofunksional dhe ka probleme të shumta, ministri vazhdon të pretendojë se çdo gjë është në rregull, madje kërkon që askush të mos i vërë në dukje të metat e punës së pretenduar që bëhet.
Duke folur në lidhje me vrasjen e nënkomisarit Saimir Hoxha, Çuçi ka thënë se sot do të përcillet Dëshmori i Atdheut. Ai u ndal edhe te kultivimi i kanabist, duke thënë se ky fenomen ka shënuar majën.
Sipas Cuçit këtë gjë e tregojnë edhe statistkat dhe ministri shpreh besimin se ky vit të jetë një ndër vitet më të suksesshëm të luftës ndaj trafikut e luftës kundër kanabisit.
“SHÇBA bën punën e saj para ligjit, mos merruni me këtë çështje, sot do të përcjellim Dëshmorin e Atdheut.
E keni gabim, statistika ka, botohen çdo muaj. Kemi statistikat që publikohen periodikisht bashkë me partnerët tanë. Lufta kundër fenomenit të kultivimit të kanabisit ka shënuar majën, e tregojnë shumë këtë.
Së pari numri i tregtarëve e parcelave të asgjësuara, e dyta presioni që është ngritur dhe nga trafikantët në lidhje me mungesën në treg të këtij produkti narkotik, janë dhe të dhëna, asnjë gomone e kapur në Itali, sivjet, të kapur me kanabis, nga forcat italiane, vetëm ne e kemi kapur. Rritja e çmimit po ashtu. Ky fenomen është zvogëluar, dhe besoj do të jetë një ndër vitet më të suksesshëm të luftës ndaj trafikut e luftës kundër kanabisit”, ka thënë Cuçi.
Por me sa duket, ministri e ka harruar se kanabisi ka pushtuar çdo cep të vendit dhe lufta ndaj tij jo vetëm që nuk ka arritur majën, por është në pikën e armëpushimit. Papërgjegjshmëria institucionale, siç ishte në rastin e Aldi Ramës, i cili duhet të ishte në arrest shtëpie, çoi madje në vrasjen e një polici ditën e djeshme.
