Luciano Spalletti nuk është më trajneri i kombëtares italiane të futbollit. Pas humbjes së rëndë ndaj Norvegjisë dhe një vale kritikash të ashpra, përfshirë edhe ato të presidentit të Federatës Italiane të Futbollit (FIGC), Gabriele Gravina, largimi i tij është zyrtarizuar.
Në një konferencë për shtyp të mbajtur sot, Spalletti konfirmoi shkarkimin nga posti, duke shprehur keqardhjen e thellë për këtë ndarje të papritur. “U takova me presidentin dhe folëm gjatë. Ai më komunikoi se më kishte shkarkuar nga detyra. Nuk doja kurrë të largohesha nga ky pozicion, nuk ishte qëllimi im,” deklaroi trajneri.
Spalletti pranoi me qetësi vendimin dhe mori përgjegjësinë për dështimin. “Ekziston një shkarkim dhe unë e marr në konsideratë atë, ashtu si rezultatet që kemi pasur. Marr përgjegjësinë e plotë për to,” u shpreh ai.
Tekniku italian tha gjithashtu se do të firmosë rezolutën konsensuale pas ndeshjes së fundit që do të drejtojë në pankinën e “Azzurrëve”, atë ndaj Moldavisë.
Kështu mbyllet një kapitull i nisur me shumë shpresë, por që përfundon me zhgënjim, pasi Spalletti nuk arriti të rikthente shkëlqimin e kombëtares italiane në skenën ndërkombëtare.
Federata Italiane pritet të shpallë trajnerin e ri në ditët në vijim.
