Vidoskandali i bërë publik ditën e sotme ku ishte i përfshirë një polic i cili akuzohet për ngacmim seksual ndaj një 15-vjeçarje, duket se e ka shqetësuar edhe vet Ministrin e Brendshëm, Sandër Lleshaj.
Lleshaj ka reaguar ashpër ndaj skandalit dhe me dy postime në rrjetin social “Twiter”, ka shprehur gjithë zemëratën. Në njërin prej postimeve ai i referohet deklaratave të tij në “Opinion” ku thoshte se fytyra e policëve është dhe fytyra e tij, thotë se identifikohet me ata që e arrestuan policin abuzues.
“Policët nuk janë të Lleshajt, por të Shqipërisë. Lleshaj identifikohet pa dyshim me policët që sot arrestuan një pervers, me policët që sakrifikojnë natë e ditë duke shërbyer.”
Gjithashtu ai ka shkruar se janë të papranueshme veprimet kur një pervers shërben si flamur për politikanë perversë, por ata nuk njollosin askënd veç vetes së tyre.
“Një pervers mund të shërbejë si flamur për politikanë perversë, por nuk mund të njollosë askënd përveç vetes së tij dhe atyre që i gëzohen ekzistencës së tij.
Mbështetje për Policinë e Shtetit Shqiptar!”, shkruan Lleshaj.
