Prokuroria e Shkupit ka nisur një hetim ndaj ish-zëvendëskryeministrit të Maqedonisë së Veriut, Artan Grubi, dhe gjykatësit të Gjykatës së Apelit, Enver Bexheti, të cilët janë përfshirë në Listën e Zezë Amerikane.
Sipas kryeprokurorit Lupço Kocevski, qëllimi i hetimit është të përcaktohet nëse ekziston përgjegjësi penale nga ana e Grubit dhe Bexhetit.
Departamenti Amerikan i Shtetit i ka akuzuar ata për përfshirje në korrupsion të nivelit të lartë dhe për pranimin e ryshfeteve me qëllim pengimin e proceseve gjyqësore, në veçanti ato që lidhen me dënimin e Sasho Mijalkovit, ish-drejtor i Drejtorisë për Siguri dhe Kundërzbulim (DSK).
“Në lidhje me listën e zezë, dua t’ju njoftoj se kam formuar lëndë për të siguruar prova për të vërtetuar përgjegjësinë penale të personave që përmenden për ryshfet dhe tregti, me ndikim. Prokuroria do të japë urdhra të mëtejshëm. Dua të theksoj se bashkëpunimi me SHBA-në dhe me Ambasadën [amerikane] është i shkëlqyeshëm si dhe na ndihmojnë në luftën kundër korrupsionit”, tha Kocevski për gazetarët.
