Ish ministri i Mjedisit, Lefter Koka, është liruar pas katër vitesh qëndrimi në burg për çështjet e lidhura me inceneratorët. Vendimi është marrë pasi GJKKO ka shuar masën e sigurisë arrest me burg për dosjen e inceneratorit të Fierit.
Sipas vendimit, masa e sigurisë për këtë çështje nuk qëndron më në fuqi, ndërsa procesi për inceneratorin e Fierit është kthyer për rigjykim në Apel nga Gjykata e Lartë.
Për sa i përket dënimit në lidhje me inceneratorin e Elbasanit, Koka ka fituar lirinë me kusht të dhënë nga Gjykata e Durrësit. Ndërkohë, për çështjen e inceneratorit të Tiranës, ai e ka shlyer dënimin me kohën e kryer gjatë paraburgimit.
Aktualisht, për të tre dosjet penale ku ishte i përfshirë Koka inceneratori i Elbasanit, Tiranës dhe Fierit nuk ka më masa sigurie në fuqi.
