E ardhmja e yllit argjentinas, Lionel Messi, vazhdon të jetë në ajër. Aktualisht, nuk ka kontakte mes tij dhe klubit, me kontratën e “pleshtit” që ka skaduar që nga 1 korriku. Barcelona është duke punuar për të ulur masën e rrogave dhe vetë Messi është i gatshëm ta ulë atë në 50%. Por për momentin nuk ka një datë dhe një orë se kur do të rikthehet t’i bashkohet Barcelonës.
Problemi është se Messi nuk ka rinovuar ende dhe nuk dihet nëse do të jetë pjesë e skuadrës. Nëse vjen, ai nuk do të jetë pjesë e fazës përgatitore në Gjermani, por do të qëndrojë në qendrën stërvitore për të punuar i veçuar, në mënyrë që të kapë ritmin.
Më 5 gusht do të bëhet prezantimi i Emersonit, i cili është një nga 4 afrimet që kanë ardhur këtë merkato. Planet e Koeman janë për t’i dhënë minuta lojtarit më 8 gusht në turneun Gamper ndaj Juventusit, por e panjohura mbetet Lionel Mesi. E ardhmja e tij është duke tensionuar nervat e të gjithëve.
Të dyja palët janë dakord për rinovimin dhe thuajse e kanë mbyllur marrëveshjen, por limiti i masës së rrogave nuk e lejon zyrtarizimin e saj. Duhet thënë që Barcelona ka detyrim patjetër që t’i zgjidhë të gjitha këto probleme nëse do që Mesi të rikthehet në datën 2 gusht. Në të kundërt, Leo duhet të presë. Është një situatë absurde, e cila arriti deri në këtë pikë sepse Bartomeu e menaxhoi shumë keq klubin në vitet e tij si president i Barcelonës.
