Kryetarja e Kuvendit, Lindita Nikolla ka uruar nxënësit për fillimin e vitit të ri shkollor. Nikolla thotë se do bëhet më e mira që nxënësit të marrin cilësinë e merituar në çdo shkollë të vendit, edhe përballë sfidave dhe vështirësive të pandemisë. Ajo shprehet besimplotë se mësuesit do të jenë krah nxënësve dhe prindërve, me përpjekjen për t’u ngritur mbi çdo vështirësi të kohës. Nikolla e quan betejën për dijen më të bukurën e jetës, teksa e mbyll me urimin për një vit të mbarë.
Mesazhi i plotë i Lindita Nikollës:
“Të dashur nxënëse e nxënës,
Të dashur mësuese e mësues,
Të dashur prindër,
Me rastin e fillimit të vitit të ri shkollor, ju uroj të gjithë fëmijëve të Shqipërisë një vit të suksesshëm shkollor!
Të gjithë jemi me mendje e zemër tek ju dhe do të bëjmë më të mirën që edhe në sfidë me vështirësitë e pandemisë të merrni cilësinë e merituar të dijes në çdo klasë e shkollë të vendit.
Jam besimplotë që mësuesit do të jenë krah jush dhe prindërve tuaj me përpjekjen e çdo dite për t’u ngritur mbi vështirësitë e kohës.
Beteja për dijen është më e bukura e jetës.
Suksese dhe një vit të mbarë!
