Operacioni “Bregdeti Ynë” që u prezantua në fillim të sezonit turistik dhe kishte për qëllim të prishte ndërtimet pa leje përgjatë vijës bregdetare, u shkëput në muajin korrik për të vazhduar sërish në muajin shtator.
Operacioni “Bregdeti Ynë” ishte pezulluar prej dy muajsh për shkak të sezonit turistik. Ndërsa rifillimin e tij e ka njoftuar zv/ministri i Brendshëm, Julian Hodaj më datë 1 shtator 2021.
Hodaj ka lajmëruar se duke filluar nga data 1 shtator e në vazhdim do të vazhdojnë me prishjen e objekteve pa leje në të gjithë bregdetin dhe zona të tjera. Gjithashtu ai ka paralajmëruar se asnjë ndërtues pa leje apo zyrtar nuk ka për t’u toleruar.
‘’Rifillon nga Dhërmiu operacioni bregdetar, që ishte pezulluar për 2 muaj prej sezonit turistik. Angazhim maksimal i qeverisë shqiptare për të luftuar paligjshmërinë në territorit. Kushdo duhet të harrojë dhe mos e gënjejë mendja që mund të zaptojë 1 m2 territor publik.
Askush nuk do të lejohet e tolerohet të abuzojë me territorin. Operacioni do të vijojë në gjithë bregdetin, më pas në zonat e tjera. Askush nuk tolerohet që ndërton pa leje dhe zyrtarët që mbyllin sytë para paligjshmërisë.’’- tha Hodaj më datë 1 shtator 2021.
Që prej datës 1 shtator e deri më tani IKMT-ja ka bërë publike vetëm dy aksione që ka ndërmarrë përgjatë vijës bregdetare, më konkretisht në jug të vendit në Sarandë dhe Ksamil. Sipas njoftimit janë prishur 22 ndërtime pa leje, 6 në Sarandë dhe 16 në Ksamil, por për këto informacione nuk ka më shumë detaje.
Gjithashtu operacioni i radhës nga Inspektoriati Kombëtar i Mbrojtjes së Territorit është kryer më datë 13.10.2021, ku sipas raportimit të bërë nga ky institucion ka vazhduar prishja e objekteve pa leje në Ksamil, por ajo që bie në sy është se nuk ka asnjë shifër të bërë publike.
“Rikujtojmë se në fazën e parë të operacionit “Bregdeti ynë” që nisi në muajin qershor, u shembën mbi 130 ndërtime pa leje, u vendosën rreth 132 milionë lekë gjoba për 86 subjekte, si dhe u arrestuan e u ndoqën penalisht dhjetëra persona.
Tashmë operacioni është rikthyer në fazën e dytë dhe vazhdon në të gjithë vijën bregdetare, ku sot u përqendrua në Ksamil.”, thuhet në njoftimin e fundit të bërë më datë 13.10. 2021 të IKMT-së.
Siç shihet qartë këto janë të vetmet shifra që janë bërë publike, por ajo që vihet re në fazën e dytë të rinisjes së operacionit, është se nuk ka asnjë numër të objekteve të prishura, gjobat që janë vendosur si dhe nuk është vendosur numri i personave që po ndiqen penalisht apo që janë arrestuar. Nga njoftimi i fundit nuk ka asnjë shifër të publikuar nga IKMT-ja për ecurinë e fazës së dytë, thjesht ka një rikujtim të asaj çfarë ka ndodhur në fazën e parë.
