Dardan Molliqaj, kreu i Partisë Social-Demokrate të Kosovës është lënë i lirë pasi u arrestua nga policia ditën e sotme. Lajmi është konfirmuar nga zëdhënësi i Policisë së Kosovës, Agron Borovci. Ai ka konfirmuar gjithashtu se edhe aktivistët e tjerë janë lënë të lirë, por ndaj tyre kanë nisur hetimet për disa akuza.
“Rreth orës 10:00 është pranuar informata për një aktivitet të paparalajmëruar nga një grup personash, të ndodhur në rrugën “Agim Ramadani” në Prishtinë. Veprimet që kanë karakterizuar këtë aktivitet kanë determinuar reagimin policor dhe për rrjedhojë pesë nga këta persona janë shoqëruar në stacionin policor. Hetuesit policor të udhëhequr nga prokurori i shtetit kanë kryer veprimet preliminare hetimore me qëllim të sqarimit dhe ndriçimit të plotë të rrethanave që kanë karakterizuar ngjarjen”, ka thënë Borovci në një deklaratë.
Ndërkohë, ndaj bashkëshortit të ish-ministres së arsimit në Shqipëri, Besa Shahini, dhe ndaj aktivistëve të tjerë është hapur një hetim për veprën penale “Procedurë Kundërvajtëse”. Ndaj dy të tjerëve është hapur hetim edhe për veprën penale “Pengim i personit zyrtar në kryerjen e detyrës zyrtare”.
Molliqaj së bashku me aktivistë të tjerë të PSD-së u arrestuan ditën e sotme, pasi penguan zhvillimin e konferencës së kryetares së Gjykatës Speciale, Ekaterina Trëndafilova.
