Ligji për gjuhën në Maqedoni tashmë është botuar në Gazetën Zyrtare. Ligji për gjuhët ka qenë më i diskutuari dhe kjo për arsyen sepse në të si gjuhë e njohur do të jetë edhe shqipja.
Megjithatë debate ka hasur edhe pas botimit në Gazetën Zyrtare, ku edhe pse publikimi i saj është bërë sipas Nenit 52/2 të Kushtetutës, opozita maqedonase nuk ndan të njëjtin mendim.
Partia VMRO-DPMNE, e ka kërcënuar drejtorin e Gazetës Zyrtare, Martin Kostovksin, se do të dënohet me burg pasi ka kryer një vepër të rëndë penale.
Nga ana tjetër drejtori i është përgjigjur se çdo përpjekje për të njollosur Gazetën Zyrtare do të denoncohet në organet gjyqësore.
Së bashku me ligjin e gjuhëve, zoti Xhaferi dërgoi për botim edhe ligjin e fundit për ndryshimet kushtetuese – ndryshimin e emrit të Maqedonisë në Maqedonia e Veriut.
Ligji thekson se “gjuhë zyrtare në Maqedoni është gjuha maqedonase dhe shkrimi i saj cirilik”.
Në nenin e dytë thuhet: “Krahas maqedonishtes, gjuhë tjetër zyrtare është edhe gjuha të cilën e flasin së paku 20 përqind e popullatës dhe alfabeti i saj”.
Pikërisht ky nen ka shkakruar edhe debatet më të mëdha dhe kjo për arsye nëse shqipja do të bëhet gjuhë e dytë zyrtare dhe me ligjin e ri arrihet pikërisht kjo.
Gjuha shqipe pritet të ketë shtrirje në përdorimin e saj në organet më të larta shtetërore, gjyqësore, në institucionet publike dhe ato lokale.
Ligji do t’i mundësojë mes tjerash, kryetarit të parlamentit, duke qenë shqiptar, që seancat t’i drejtojë në gjuhën e tij amtare. Edhe ministrat shqiptarë në seancat e qeverisë do të mund të flasin shqip.
Miratimi i ligjit për përdorimin e gjuhëve nga shumica parlamentare, Lidhja Social Demokrate dhe Bashkimi Demokratik për Integrim, vlerësohet si përmbyllje e Marrëveshjes së Ohrit, të arritur në gusht 2001.
Shqiptarët, sipas statistikave zyrtare përbëjnë 25 përqind të popullsisë së Maqedonisë.
