Liga Profesioniste e Futbollit kishte parashikuar një mbledhje për ditën e nesërme por diçka ka ndodhur dhe planet e organizatorëve kanë ndryshuar.
Presidentët e klubeve të ekipeve të Kategorisë Superiore do të mblidhen sot në orën 13:00 për të diskutuar në lidhje me bojkotin e ndeshjeve dhe fillimin e sezonit të ri futbollisitik i cili duhet të startonte me 12 shtator.
Kujtojmë se ditën e djeshme Federata Shqiptare e Futbollit njoftoi se këtë fundjavë do të fillojë edicioni i ri futbollistik 2020/2021 në Kategorinë e Parë, Kategorinë e Dytë dhe në të gjitha nivelet e moshave. Deputeti Fidel Ylli tha ditën e djeshme se qeveria do t’i plotësojë këto kërkesa por nuk duhet negociuar mbi afate dhe kushte, pasi sipas tij gjithçka arrihet me dialog.
Ka shumë mundësi që futbolli elitar në vend të nisë të shtunën ose të dielën, teksa problemi i vetëm mbetet çështja e stadiumeve. Kjo gjë pritet të diskutohet edhe në mbledhjen e sotme. Në rast se ky problem zgjidhet atëherë Kategoria Superiore mund të zbresë në fushë që këtë fundjave, në të kundërt do të të pritet java e ardhshme.
