Vdekja e 32-vjeçarit Lear Kurti në duart e Policisë së Shtetit para disa javësh ngjalli një reagim kombëtar, ku pati edhe zhvillim të protestave. Ngjarja ndodhi mbrëmjen e 19 tetorit në zonën e Laprakës, pranë spitalit të Traumës, teksa Policia u vu në ndjekje të tij. Familja e viktimës hodhi dyshime të forta mbi raportimin e vdekjes, për shkak të tentativave të institucioneve shtetërore për të mos e raportuar saktë shkakun e humbjes së jetës së Learit.
Por ditën e sotme, motra nga babai Learit ka folur më shumë për “News 24”.Ajo ka treguar detaje mbi viktimën, Lear Kurtin dhe gjithashtu ka treguar raportin që ai kishte me babain e ndjerë.
Pjesë nga intervista e motrës së Lear Kurtit për “News 24”:
Si kanë qenë raportet e Learit me babain?
Më ka thënë që nuk kishte shumë raporte me të atin, por ishte babai i tij dhe e donte. Learin nuk e shikonte ditë për ditë. Leari jetonte me Fatmirin. Babai nuk jeton më.
Flisnit shpesh me babain në lidhje me Learin?
Jo aq shumë. Ne nuk kemi jetuar me babin. Kam jetuar kur isha shumë e vogël dhe nuk e mbaj mend.
Çfarë ndodhi me babain tuaj?
Nuk e di. Familja ime më ka thënë që babi jot ka vdekur. Unë e kam lexuar në një gazetë që e kishte vrarë dikush. Nuk mund t’u them shumë gjëra për babin.
Ke folur me Learin për vdekjen e babait?
Po, por as ai nuk e dinte.
Çfarë të thanë shokët e Learit?
Më thanë që Leari ka humbur jetën.
Kur flisnit gjatë, çfarë shqetësimesh kishte Leari? Punonte?
Leari ishte shumë i zgjuar, lexonte shumë libra. Kishte gjetur një punë në Francë dhe do vinte në Francë.
Keni dijeni që kishte një problem ligjor?
Jo nuk kemi folur. Më tha që i kishte ofruar dikush punë në ndërtim jashtë Shqipërisë.
Ka qenë përdorues i lëndëve narkotike?
Unë nuk jetoja me Learin, e shihja vetëm në kamera. Nuk e kam parë kurrë në ndonjë gjendje të keqe siç janë njerëzit që marrin narkotikë.
Sa kohë ka që ka ndërruar jetë babai juaj?
Unë isha 16 vjeç, tani jam 27.
