Lëvizje e papritur dhe e bujshme në radhët e Policisë së Vlorës, shkarkohet drejtuesi i saj.
Bëhet fjalë për Gentjan Shehajn, i cili që prej prillit të vitit 2017, mbante këtë rol. Megjithëtë ajo që mësohet është se shkak për shkarkimin e Shehajt nuk është bërë ndonjë aryse e veçantë apo shkelje e ligjit, thjesht është vendosur që ish-drejtori i Policisë së Vlorës të marrë një post të rëndësishëm në Akademinë e Sigurisë.
Shehaj është një nga uniformat blu i cili mban edhe gradën “drejtues i parë” dhe kjo për shumë arsye mund të ketë sjellë benefite për të.
Tashmë është bërë e ditur edhe cili do të jetë zëvendësuesi i tij dhe bëhet fjalë për Artion Dukën, ish- drejtorin e Policisë Berat, i përmenduri kryesor edhe për çështjen e përgjimeve përmes pajisjes Imsi Catcher, e cila është kthyer në skandal në qershor të vitit 2016.
Gjatë kësaj kohe Duka ka mbajtur rolin e drejtuesit të Forcave Operacionale dhe madje është arrestuar bashkë me një specialist tjetër me urdhër të Prokurorisë duke u akuzuar për përgjime të paligje, megjithatë i është dhënë liria shumë shpejt.
Vetëm një vit më parë, në prill 2018 Artion Duka u emërua në Drejtorinë e Policisë së Qarkut të Beratit, emërim i cili ngjalli jo pak debate nga radhët e opozitës, duke hedhur akuza se Duka e ka përdorur pajisjen e famshme IMSI Catcher për të përgjuar gazetarë, politikanë, analistë e ambasadorë.
