Teksa po zhvillohet seanca plenare, anëtarët e “Lëvizjes Bashkë” kanë protestuar ditën e sotme në ambientet jashtë Kuvendit.
Ata kërkojnë nga ligjvënësit që të miratojnë minimumin jetik.
Drejtuesi i lëvizjes Arlin Qori u shpreh se minimumi jetik është një domosdoshmëri dhe se është një fatkeqësi të jesh pensionist në Shqipëri.
Sipas tij në vendet e përparuara, dita e pensionit është një ditë ku qytetarët gëzojnë frytet e punës që kanë kryer përgjatë dekadave, ndërkohë që në Shqipëri dita e pensionit është një ditë e mallkuar.
“Ne jemi akoma në kushtet ku të varfërit i jepet e njëjta përgjigje nga shteti i tij, i cili i thotë zoti të dhashtë dhe nëse nuk i thotë zoti të dhashtë, i thotë të dhëntë fëmija. Shteti nuk ka asnjë lloj detyrimi. Ti mund të kesh punuar për 40 vite në të bardhë dhe në të zezë dhe shteti nuk ka asnjë lloj detyrimi ndaj tyre. Rrofshin kalamajtë që ikin nga sytë këmbët në Gjermani e Amerikë, mbrapa diellit dhe që punojnë nga dy punojnë nga dy ose tre punë jo vetëm për të mbajtur veten, por për të mbajtur dhe bashkëfamiljarët e tyre. Mjerë në Shqipëri po dole në pension. Në vend e përparaua pensioni është një ditë që qytetari mezi e pret pasi ka punuar disa dekada dhe thotë që do ruaj nivelin e mirëqenies dhe nuk do shkoj në punë. Në Shqipëri dita e pensionit është e mallkuar, për atë shumicë që merr 80 mijë lekë”, deklaroi Qori.
