Presidenti Ilir Meta ka denoncuar sot tentativat e qeverisë dhe Bashkisë Tiranë për cenimin e veprimtarisë së opozitës në prag zgjedhjeve të 25 prillit.
Me anë të një letër drejtuar KQZ-së, Meta iu referua ngjarjes së ndodhur pak ditë më parë në ambientet e selisë së FRD-së.
Presidenti ka paralajmëruar se do të monitorojë të gjithë veprimtarinë shtetërore dhe se do të frenojë çdo përpjekje për cenim të votës së lirë.
Pjesë nga letra:
“Në funksion të realizimit të një procesi zgjedhor të qetë dhe sipas standardeve evropiane; për mbrojtjen dhe respektimin e të drejtave dhe lirive themelore kushtetuese; dhe për të frenuar e denoncuar çdo fenomen negativ që mund të shfaqet, Presidenti i Republikës përgjatë gjithë periudhës së fushatës zgjedhore, e në vijim, do të ketë vëmendjen maksimale, për të monitoruar të gjithë veprimtarinë shtetërore, dhe situatën zgjedhore në tërësi, për të evidentuar apo frenuar çdo veprim apo mosveprim të kundraligjshëm që reflekton apo është shprehje e hapur e përpjekjeve për të ushtruar trysni politike, apo që synon të cenojë votën e lirë të qytetarëve të Republikës së Shqipërisë, sepse vetëm zgjedhjet e lira dhe të ndershme do t’i japin fund krizës së legjitimitetit dhe të përfaqësimit, si dhe do të zhbllokonin çeljen e negociatave me Bashkimin Europian“, shprehet ndër të tjera Meta në letrën drejtuar KQZ.
