Përgjatë seancës së sotme plenare ish-kryeministri Berisha i ka dhënë vëmendje letrës së ambasadës ruse drejtuar shtetit shqiptar. Ai e konsideroi një letër kërcënuese, një fyerje dhe një kërcënim për çdo shqiptar. Sipas ish-kryeministrit Berisha është fund e krye kapitullim i argatit të Beogradit në Tiranë.
“Dua të dënoj këtu letrën kërcënuese të ambasadës ruse në Tiranë drejtuar Shqipërisë dhe dua të theksoj se letra është një fyerje dhe kërcënim për çdo shqiptar dhe është rrjedhojë fund e krye e kapitullimit të argatit të Beogradit në Tiranë, Edvin Kristaq Ramës. Para një shantazhi primitiv, të paprecedentë me të cilin përballet Europa. Sot, Rusia tejkalon si forcë e të keqes çdo forcë në kërcënim që ka njohur historia. Kërcënon të përdorë armë bërthamore dhe fuqinë e saj kundër vendeve të lira, të pushtojë një vend fqinj. Po përpiqet të shkatërrojë NATO-n, dhe vendi i vetëm që ka heshtur si fija e barit ndaj këtij shantazhi është një vend anëtar i NATO-s. Po kërcënon vendet e tjera, vendi i vetëm që ka heshtur ndaj këtij shantazhi të pashembullut është vendi i NATOS, I DREJTUAR nga vasal i Vuçiç. E ngrita dhe një javë më parë, parlamenti duhet me urgjencë të votojë një rezolutë ku të shprehë solidaritetin me Ukrainën, mos harroni një gjë këtu, ka një traktat katërplaësh në të cilën Rusia është firmëtare, traktati i Budapestit, në të cilën Rusia, SHBA dhe Britania e Madhe zotohen se këtij vendi nuk do ti preken kufinjtë. Ukraina i dorëzoi të gjitha në mirëbesim. Parlamenti është i kërcënuar”, u shpreh ish-kryeministri Berisha.
Kujtojmë që ambasada ruse i ka dërguar Shqipërisë një letër, në të cilën kërkon të dijë pozicionin e saktë të vendit tonë në lidhje me konfliktin e hapur me Ukrainën. Në letër, Rusia thotë se situata kërkon që të ketë një sqarim të sinqertë të Shqipërisë, për sa i përket pozicionit. Më tej thuhet se partnerët e saj duhet ta kuptojnë detyrimin që kanë për të mos forcuar sigurinë në kurriz të sigurisë së shteteve të tjera.
‘Situata kërkon një sqarim të sinqertë të pozicioneve. Ne duam të marrim një përgjigje të qartë për pyetjen se si partnerët tanë e kuptojnë detyrimin e tyre për të mos forcuar sigurinë e tyre në kurriz të sigurisë së shteteve të tjera në bazë të përkushtimit ndaj parimit të sigurisë së pandashme. Sa synon konkretisht Qeveria juaj ta përmbushë këtë detyrim në aspektin praktik në rrethanat aktuale? Nëse e refuzoni këtë detyrim, ju kërkojmë ta shprehni qartë këtë. Pa pasur qartësi të plotë për këtë çështje kyçe që lidhet me ndërlidhjen e të drejtave dhe detyrimeve të miratuara në nivelin më të lartë, është e pamundur të sigurohet ekuilibri i interesave të mishëruara në instrumentet e samiteve të Stambollit dhe Astanës. ‘- thuhet midis të tjerash në letër.
