Ndërkohë që Ukraina ndodhet në një gjendje kritike me frikën e një lufte që po i “troket” nga momenti në moment në derë, Britania e Madhe lëshon alarmin, duke thënë se plani rus i pushtimit “ka filluar tashmë”, raporton BBC.
Një zëdhënës i kryeministrit të Mbretërisë së Bashkuar Boris Johnson ka thënë në një konferencë për media se raportet e inteligjencës sugjerojnë se presidenti rus Vladimir Putin synon të nisë një pushtim të Ukrainës.
“Ajo çka po shohim sugjeron se Rusia synon të nisë një pushtim dhe se plani i Presidentit Putin tashmë ka filluar”, u tha zëdhënësi gazetarëve.
“Ne po shohim elementë të njohur të librave rusë, elementë të cilët po tashmë po shfaqen në kohë reale”.
Ndërkohë, ministrja e Jashtme gjermane, Annalena Baerbock, i bëri thirrje të hënën presidentit rus Vladimir Putin që të “mos luajë me jetë njerëzore” në Ukrainë, në fillim të një jave tjetër të tensionit diplomatik në Evropë.
“I bëj thirrje me këmbëngulje qeverisë ruse, presidentit rus: Mos luani me jetë njerëzore!” tha Baerbock në Bruksel pas mbërritjes në takimin e Këshillit të Punëve të Jashtme Evropiane.
“Loja me civilë dhe me njerëzit në zonat e okupuara – nga të dyja palët – është e papërgjegjshme”, shtoi ajo.
Duhet theksuar se varësia e Evropës nga gazi rus përbën një kërcënim gjeo-ekonomik për sovranitetin energjetik të Evropës nëse tensionet vazhdojnë të përshkallëzohen në Ukrainë. Raporti i Tregut të Gazit 2021 nga Agjencia Ndërkombëtare e Energjisë (IEA) ka treguar se konsumi evropian i gazit u rrit 14% në 2021 krahasuar me 2020.
Nëse gazsjellësi Nord Stream 2 ndalet nga aleanca e NATO-s për shkak të sanksioneve, mund të çojë në një krizë energjetike në Evropë në vitin e ardhshëm. Këtu është një vështrim në disa nga këto zhvillime që mund të ndikojnë potencialisht në furnizimin me energji në Evropë dhe të kenë pasoja më të gjera të sigurisë.
