Aleks Ndreka, i njohur në botën e krimit si “Leksi i Druve”, është arrestuar në aeroportin e Malpensas në Milano, dhe pritet të ekstradohet në Shqipëri. Arrestimi i tij vjen si rezultat i një operacioni ndërkombëtar në kuadër të megaoperacionit “Metamorfoza”.
Ndreka, 47 vjeç, ishte i shpallur në kërkim ndërkombëtar dhe i akuzuar për veprat penale të “Sigurimit të kushteve dhe mjeteve materiale për të kryer vrasje”, si dhe për pjesëmarrje në grup të strukturuar kriminal. Sipas Gjykatës së Posaçme Kundër Korrupsionit dhe Krimit të Organizuar (GJKKO), Ndreka dyshohet se ka vepruar në bashkëpunim të ngushtë me persona të tjerë, duke ofruar ndihmë logjistike për kryerjen e vrasjeve.
Operacioni i arrestimit u koordinua nga Policia italiane në bashkëpunim me Interpol Tiranën dhe Interpol Romën. Policia e Shtetit njoftoi se informacionet e shkëmbyera ndërmjet palëve ndihmuan në lokalizimin dhe kapjen e Ndrekës, i cili tashmë pret procedurat e ekstradimit për t’u kthyer në Shqipëri dhe për t’u përballur me akuzat.
Ekstradimi i Ndrekës pritet të ndihmojë në zbardhjen e rrethanave të veprave të tjera kriminale dhe të ofrojë më shumë informacion mbi strukturat e grupeve kriminale që operojnë brenda dhe jashtë vendit.
