Para pak ditësh policia arrestoi një agjent të AKU-së dhe një agjent doganor në Durrës. Dyshohet se në ngarkesën ku kishte kokainë të fshehur në kontejnerin e “Bana King”, të arrestuarit në fjalë, kanë firmosur shkresën për ngarkesën me fruta ekzotike. Lavdosh Zerba dhe Julian Merhori, punonjës në doganën e Durrësit dhe Bujar Qyrku punonjës i AKU-së u prangosën pasi lejuan që të kalojë kamioni i “Bana King” me kokainë, teksa në skaner nuk u konstatua droga, por kur u kontrollua nga policia u gjetën 119 kg kokainë e cila vinte nga Ekuadori dhe ishte fshehur në kamionat me banane të kompanisë “Bana King”. Gjykata e Tiranës ka dhënë sot masën e sigurisë “arrest shtëpie” për dy agjentët doganor të Portit të Durrësit dhe punonjësin e AKU-së që lejuan kalimin e konteinerit me 119 kg kokainë.
Kujtojmë se pas kokainës së konstatuar në një nga magazinat e kompanisë së bananeve në Vaqarr, u prangosën 3 persona, Marson murataj, Gëzim Kalaja, Hasan Saliu. Murataj një nga të ‘piketuarit’ e skandalit me 119 kg kokainë në kontejnerin me banane, figuron si administrator i firmës, por në të vërtet ai është krye-menaxher i pritjes së kontejnerëve në Durrës, transportit të tyre në magazina dhe shpërndarjen e bananeve tek konsumatori. Lajmi në fakt ka marrë ‘dhenë’, ndërsa për sekuestrimin e kokainës e fshehur ‘mirë e bukur’ në banane, nuk ka pasur një reagim zyrtar nga ana e ministrit të brendshëm, Bledi Çuçi, drejtorit të policisë, Gledis Nano, dhe as nga ana e drejtorit të Portit të Durrësit, Pirro Vengu.
