Teksa ndodhet prapa hekurave që prej 16 dhjetorit 2021, Lefter Koka nuk ndalet në betejën e tij për të fituar lirinë.
Bëhet e ditur se ditën e sotme, ish-ministri i ka dërguar Gjykatës së Lartë dy kërkesa për ndryshim të masës së sigurisë. Koka ka kërkuar që t’i ndryshohen masat e sigurisë për aferën e inceneratorëve të Fierit dhe Elbasanit me pretendimin se ka probleme shëndetësore. Ndërkohë që këto kërkesa priten të shqyrtohen nga gjyqtari Mehdi Bici më 16 shkurt, në Gjykatën e Lartë.
Lefter Koka kërkon masë më të butë me argumentin se ka probleme shëndetësore. Ai akuzohet për korrupsion, shpërdorim detyre dhe pastrim parash, për ndërtimin e dy inceneratorëve atë të Fierit dhe Elbasanit.
Sipas Prokurorisë së Posaçme, në cilësinë e ministrit te Mjedisit, Koka ka shkelur ligjin gjatë procedurës për dhënien me koncesion të inceneratorit të Elbasanit dhe të Fierit duke përfituar rreth 5 milionë euro ryshfet. Përvec hetimit penal, ndaj ish-ministrit ka nisur edhe hetim pasuror ndërsa janë vënë në sekuestro 5 pasuri në emër të tij dhe familjarëve.
Vlen të theksojmë se ish-ministri Lefter Koka u arrestua për shkak të aferave korruptive me inceneratorët ku akuzohet për veprat penale ‘ shpërdorim detyre’, ‘korrupsion‘ dhe ‘pastrim parash’. Kujtojmë se SPAK akuzon Kokën se ka përfituar ryshfet nëpërmjet kompanive fiktive të zotëruara nga familjarë dhe të njohur të tij.
