Lidhja Demokratike e Kosovës ka refuzuar për herë të tretë ofertën e Lëvizjes Vetëvendosje për një koalicion qeverisës, duke propozuar në vend të kësaj formimin e një qeverie kalimtare që do të funksionojë deri në zgjedhjen e presidentit të ri në vitin 2026.
Kryetari i LDK-së, Lumir Abdixhiku, në një konferencë për media të martën, deklaroi se partia e tij mban të pandryshuar qëndrimin kundër bashkëqeverisjes me LVV-në.
Ai tha se zgjidhja e vetme që mund të sjellë stabilitet është krijimi i një qeverie kalimtare me emra unifikues, që do të ketë mandat të kufizuar dhe detyra të qarta.
Sipas Abdixhikut, kjo ide është diskutuar edhe me drejtues të tjerë të subjekteve politike në vend.
Ndërkohë, më 5 maj, kryeministri në detyrë dhe lideri i LVV-së, Albin Kurti, i ka dërguar një letër zyrtare Abdixhikut, duke e ftuar për një marrëveshje politike mes dy partive.
Letra është bërë publike pas përpjekjes së 11-të të dështuar për konstituimin e Kuvendit të Kosovës.
