Pasi mori një sfidë të jashtëzakonshme për të vrapuar 2750 kilometra nga Cambridge në Tropojë, Seb Ponari ka nisur tashmë fazën tjetër të udhëtimit të tij në Shqipëri.
Me një ritëm të papërkulur, ai po përpiqet të përshkojë në tre ditë distancën nga Tirana në Ksamil.
Ponari thekson se nuk e sheh rrugën si një sërë sfidash, por si një seri qëllimesh të qarta që ka vendosur vetë.
“Pasi vendosa të vrapoja nga Cambridge në Tropojë, vendosa të vrapoj nga Tropoja në Ksamil. Sot ndodhem në Tiranë, më pas do të shkoj në Lushnje,” shpjegon ai, duke shtuar se për të mbërritur deri këtu ka kaluar nëntë shtete.
“Tani them që Shqipëria bëhet, pavarësisht se e shikoj shumë larg vendin tonë në lidhje me shtetet që shkela dhe kjo vjen për shkak të mentalitetit që njerëzit kanë.”
Vështirësitë e udhëtimit nuk mungojnë, por sipas Ponarit, moti i nxehtë dhe trafiku janë vetëm disa nga sfidat që e kanë shoqëruar.
“Megjithatë unë nuk shikoj pengesat, por objektivat,” thotë ai.
Pas përfundimit të kësaj sfide, Ponari planifikon të rikthehet në jetën normale, por sporti do të vazhdojë të jetë pjesë e pandashme e tij.
“Pas meje gjithmonë më ndjek pas një makinë edhe tani është duke më pritur. Në Ksamil kam qenë me familjen vjet për 3 javë dhe do vij sërish në gusht. Aty kam provuar ushqimin më të mirë. Pas kësaj sfide do t’i kthehem jetës së përditshme. Po nuk e sfidova veten nuk ndihem i motivuar. Ka mbi tre muaj që nuk punoj, në ditë bëj mbi 70 km. Kam familje dhe në Angli më pret një biznes për të administruar, megjithatë do merrem sërish me sport. Dikur përdorja lëndë narkotike dhe tani atë e kam zëvendësuar me sport. Një ves nuk hiqet dhe lihet bosh, unë e kam kthyer në sport,” përfundon ai.
Ky rrugëtim i jashtëzakonshëm është një dëshmi e forcës së vullnetit dhe dëshirës së Ponarit për të tejkaluar çdo pengesë për të arritur qëllimet e tij.
