Largimi i Luis Suarez nga Barcelona ka mërzitur edhe shokun e tij të skuadrës argjentinasin, Lionel Messin i cili i ka shprehur hapur vendimet e klubit.
Pasi kujtojmë se presidenti, Josep Maria Bartomeu ka larguar deri më tani dy nga miqtë më të afërt të Messit, mesfushorin kilian Arturo Vidal dhe sulmuesin uruguaian Suarez.
Në një postim në Instagram, 6-herë fituesi i “Topit të Artë” ka publikuar disa foto me Luis Suarez dhe një mesazh lamtumire mesazh në të cilin argjentinasi nuk ka qëndruar pa thumbuar klubin blaugrana.
POSTIMI I LIONEL MESSIT
“Sot po hyja në dhomën e zhveshjeve, por fotoja jote nuk ishte më. Do të jetë e vështirë tashmë që ti je larguar, si brenda ashtu edhe jashtë fushe. Janë shumë vite që kemi kaluar bashkë, dreka, darka që do të më mungojnë. Shumë gjëra që nuk do të harrohen kurrë, pasi ne kalonim pothuajse çdo ditë së bashku.Do të jetë e çuditshme të të shikoj me një fanellë tjetër dhe aq më shumë të luaj përballë teje si kundërshtar. Ti je një nga lojtarët më të rëndësishëm të këtij klubi dhe ke shkruar historinë këtu. Ke arritur gjëra të rëndësishme si në grup ashtu edhe në aspektin individual. Nuk e meritoje të dëbohesh siç ndodhi, por nuk jam aspak i habitur me ta. Të uroj gjithë të mirat në këtë sfidë të re si dhe të dua shumë. Shihemi së shpejti miku im,” shkruan Messi.
Suarez ndërkohë është transferuar tek Atletico Madrid dhe do të mundohet të vijojë të shënojë gola të rëndësishëm në La Liga dhe Champions.
