Grupi Parlamentar i Partisë Demokratike, ka propozuar deputeten Ina Zhupa si zëvendësuese e Flutura Açkës në krye të komisionit të Edukimit. Kreu i Grupit Parlamentar të PD, Gazment Bardhi i është drejtuar kryetares së Kuvendit me një shkresë ku pasqyrohet propozimi. Largimi i deputetes Flutura Açka nga grupi parlamentar i PD, vjen pak orë pasi mazhoranca dhe opozita arritën dakordësi për draftin për Reformën Zgjedhore.
Açka e ka bërë me dije lajmin përmes një postimi në rrjetet sociale. Mes ironisë, ajo ka thënë se ra maska e fundit dhe tani, sipas saj, ka mbetur edhe akti i fundit, Komisioni AntiSPAK. Ajo thotë se nuk do të bëjë minën ndaj demokracisë, ndaj largohet nga Grupi i PD-së.
