Largimet nga LSI drejt PS-së janë bërë të përditshme, sidomos në prag të fushatës. Kjo e ka detyruar Presidentin Ilir Meta që të komentojë për herë të parë publikisht largimet e disa figurave nga Lëvizja Socialiste për Integrim, si Nasip Naço, apo Gledion Rehovica.
Nga Vlora, Kreu i Shtetit iu drejtua të gjitha forcave politike, duke iu kërkuar të promovojnë figura të reja, që nuk i fshihen kamerave e debateve, si dhe që janë të pastra dhe pa probleme me dekriminalizimin.
“Unë jam këtu për të qenë transparent para banorëve të Orikumit e Vlorës, por edhe të gjithë shqiptarëve. Jam i sigurt që zgjidhja më e mirë do të jetë 25 prilli. Më vjen shumë keq të merrem me çështje që nuk më takojnë aspak mua. Kam një sugjerim për të gjitha partitë, që të promovojnë figura të reja, të pakonsumuara, në Vlorë e gjithë Shqipërinë”, tha Meta, duke aluduar se të larguarit kanë probleme me figurën e tyre.
Më tej, Meta deklaroi se LSI i ka larguar figurat politike me probleme me dekriminalizimin.
“Ja ku janë bashkëpunëtorët e mi. Ju thashë që të gjithë forcat politike të promovojnë figura të reja, që luftojnë për interesin publik, që nuk i fshihen kamerave, debateve, dhe figurave të pastra, pa probleme me dekriminalizimit. Ka pas LSI figura me probleme me dekriminalizimin dhe ka bërë shumë që s’i ka mbrojtur, që është pastruar”, deklaroi Presidenti Meta.
/Gazetareforma.com/
