Një rast i ri me Coronavirus është regjistruar së fundmi në vendin tonë, pasi burime pranë Infektivit kanë bërë me dije për BalkanWeb se një person ka rezultuar pozitiv në testin e COVID-19.
E infektuara është një 65-vjeçare nga qyteti i Patosit, e cila është nisur me urgjencë drejt Spitalit Infektiv dhe ende nuk dihet gjë rreth gjendjes së saj shëndetësore.
Kështu, ka shkuar në 65 numri i të prekurve nga Coronavirusi në Shqipëri, teksa janë regjistruar 2 viktima.
Virusi që lindi në Kinë në fund të 2019, ka shkaktuar deri tani rreth 10, 000 viktima dhe ka infektuar mbi 241,000 persona në 177 shtete.
OBSH ka shpallur pandeminë, teksa epiqendra e virusit tashmë është zhvendosur në Europë, në një kohë kur Kina po rimerr veten dita-ditës dhe madje po ndihmon shtetet e tjera të prekura.
Qeveria shqiptare ka ndërmarrë një sërë masash për të parandaluar përhapjen e Coronavirusit, teksa është kufizuar qarkullimi i makinave dhe i këmbësorëve.
Gjithashtu ka nisur aplikimi i gjobave për ata që nuk respektojnë rregullat e vetëkarantinimit, kompanitë që nuk marrin masat ndaj Coronavirusit dhe tregtarët që rrisin çmimet në mënyrë abuzive.
