Mesfushori danez, Christian Eriksen, zbarkoi ditën e djeshme në Milano për të bërë vizita më të detajuara mjekësore dhe për të vendosur përfundimisht për të ardhmen e tij në futbollin italian.
Ndërsa sot, danezi ka vizituar qendrën stërvitore të Interit në “Apiano Gentile” dhe ka takuar të gjithë shokët e skuadrës. Vetë faqja e Interit postoi pamjet e takimit të Eriksen me shokët e skuadrës, duke hedhur një fotografi të grupit të plotë të zikaltërve.
“Mëngjesin e sotëm, Christian Eriksen bëri një vizitë në qendrën stërvitore Suning, në “Apiano Gentile”. Mesfushori danez takoi drejtuesit e klubit, trajnerin, shokët e skuadrës dhe pjesëtarët e stafit.
Eriksen po bën mirë dhe është në gjendje të shkëlqyer psikologjike dhe në formë të mirë nga ana e mentalitetit. Ai do të ndjekë programin e rikuperimit duke u konsultuar me doktorët danez në Kopenhagen’’, shkroi Interi në faqen zyrtare.
Çfarë ndodhi me Eriksen në “Euro 2020”?
Drama filloi në minutën e 42-të të ndeshjes, teksa Danimarka po sulmonte portën e Finlandës. Kamerat televizive shfaqin në plan të parë Eriksen, të cilit po i vështirësohej frymëmarrja teksa ndiqte një top të pasuar nga shoku i ekipit. Mesfushori ngadalësoi ecjen, humbi ekuilibrin dhe u rrëzua në tokë.
Shumë shokë të ekipit të Eriksen ishin në lot dhe të tjerët u larguan, pa mundur të shikonin skenat shqetësuese. Ndërkohë, Kjaer dhe portieri Kasper Schmeichel vrapuan për të ngushëlluar bashkëshorten e Christian, Kvist Jensen, e cila zbriti në fushë e tronditur.
