Wembley do të hapet me 75% të kapacitetit për gjysmëfinale dhe finalen e EURO 2020. Më shumë se 60 mijë tifozë do të lejohet të marrin pjesë në gjysmë-finalen dhe finalen e EURO 2020, këtë njoftim e ka dhënë ditën e sotme qeveria britanike.
Në ndeshjet e rëndësishme që do të zhvillohen përgjatë muajit korrik do të shohim numrin më të madh të tifozëve të mbledhur ndonjëherë në një ngjarje sportive në Britani, në më shumë se 15 muaj, sepse numri i tifozëve që kanë marrë pjesë në ndeshje ka qenë i kufizuar në mënyrë rigoroze për shkak të pandemisë globale të COVID-19. Gjithashtu të gjithë tifozët do të duhet të ndjekin masat e rrepta për hyrjen në stadium, përfshirë këtu një test negativ Covid-19 ose provë të vaksinimit të plotë.
“Ne kemi punuar jashtëzakonisht ngushtë me UEFA dhe FA (Shoqata e Futbollit) për të siguruar masa rigoroze dhe të shtrënguara të shëndetit publik ndërsa lejojmë më shumë tifozë të shohin veprimin drejtpërdrejt,” tha sekretari i kulturës dhe sportit Oliver Dowden.
“Finalet premtojnë të jenë një moment i paharrueshëm në rimëkëmbjen tonë kombëtare nga pandemia.”
Kujtojmë se UEFA pak ditë më parë i dha ultimatum Anglisë që të merrte masa që të gjithë tifozët të ishin të pranishëm, ose në të kundërt finalja do të zhvendosej diku tjetër në rast se nuk heq kufizimet.
Qeveria britanike ka reflektuar duke i hequr të gjitha kufizimet nga 19 korriku, por gjithsesi finalja e EURO 2020 do të luhet me kapacitetin më të madh të parë ndonjëherë në Angli gjatë pandemisë.
