Është ndarë nga jeta në moshën 80-vjeçare ‘Mjeshtri i Madh i Punës’ Vehap Xhindolli. Ai ishte i shtruar në spital prej disa kohësh, pasi ishte prekur nga koronavirusi, ndërsa mbrëmjen e sotme ka mbyllur sytë përgjithmonë.
Xhindolli ia doli që në moshën 70-vjeçare të mësonte anglishten dhe madje arriti që brenda një viti të përkthente edhe libra nga kjo gjuhë, që ishte e pesta që zotërohej shkëlqyeshëm prej tij. Gjatë rinisë ai kishte mësuar edhe frëngjishten, rusishten e gjermanishten.
Ndër të tjera, Vehap Xhindolli ishte edhe një emër i shquar i peshëngritjes dhe për 10 vite mbajti titullin “kampion absolut” dhe ka thyer disa rekorde, duke shënuar arritje të shquara. Ndër të tjera, Xhindolli njihej edhe si themelues i cirkut në Elbasan , duke qenë një nga emrat me më shumë kontribute në këtë qytet. Për kontributin e tij të çmuar në disa fusha, ai ishte nderuar edhe me titullin “Qytetar Nderi i Elbasanit”.
Ai gjithashtu ishte nderuar nga presidenti Ilir Meta me titullin “Mjeshtër i Madh i Punës” “në shenjë vlerësimi për veprimtarinë e shquar sportive, si një nga figurat historike të peshëngritjes së qytetit të Elbasanit, me kontribut të çmuar si sportist e trajner i suksesshëm, duke ngritur lart emrin e prestigjin e peshëngritjes shqiptare.”
