Kryeministri Edi Rama ka dhënë një lajm të mirë për shqiptarët, të cilët tashmë janë të izoluar në shtëpi për shkak të koronavirusit.
Në një komunikim online, Rama tha se që nga dita e nesërme paketat e internetit do të kushtojnë 50% më lirë, për 5 javët e ardhshme.
Më tej shefi i qeverisë shtoi se RTSH dhe çdo format edukativ do të jetë falas.
Për abonentët me kontratë fikse, do të ketë 60% ulje në platformat për fëmijë.
“Falë bashkëpunimit dhe mirëkuptimit është siguruar me gjithë vështirësisë kudo ku ka qënë e mundur aksesi në pikat kryesore të shitjes dhe shërbimi ndaj klientit. Teknikët do të jenë në terren për mirëmbajtjen e rrjeteve, në funksion të situatës do të jenë edhe ekipet teknike. Përmes AKEP kemi ngarkuar sipërmarrësit të ofrojnë për pajtimtarët mundësi shfrytëzimi maksimal dhe cilësor me kushte sa me të favorshme. Edhe pas testeve teknike që janë bërë dhe janë koordinuar në vendimarrje lidhur me ofertat e vlefshme nga nesër deri në fund të prillit do të ofrohet oferta me 50% internet për 5 javë. Falas do të jetë RTSH dhe çdo format edukativ. Abonentët me kontratë fikse kanë akses në platformat për fëmijë 60% më lirë”, tha Rama.
Pas këtij njoftimi, kreu i ekzekutivit përsëriti edhe njëherë thirrjet për shqiptarët, që të mos dalin nga shtëpitë, ndërsa përmendi shembullin e SHBA-ve, ku pacientët variojnë nga mosha 20-45 vjeç.
Kujtojmë këtu se ditën e sotme numri i të prekurve nga koronavirusi në vendin tonë shkoi 70.
Në mesin e tyre janë edhe dy viktima, një 73-vjeçare nga Durrësi dhe një 66-vjeçar nga Lushnja.
Tirana mban vendin e parë me 50 të prekur, ndërsa ndiqet nga Fieri me 7, Durrësi me 5 dhe Kavaja, Rrogozhina, Elbasani dhe Lushnja me 2.
Pas Infektivit, ka nisur funksionimi i karantinës të Kavalishenca në Durrës.
