Zhvillimi i Samitit të BE-së në Tiranë ka sjellë që në mëngjes një lajm të mirë për shqiptarët.
Marrëveshja e parë që është nënshkruar në samitin e Be-Ballkani Perëndimor në Tiranë është marrëveshja Roaming, që synon uljen e tarifave.
Theksojmë se nënshkrimi i Deklaratës së Roaming-ut, do të garantojë ulje të ndjeshme të tarifave roaming që nga 1 tetori 2023. Tarifat afër niveleve të çmimeve kombëtare synohen të arrihen deri në vitin 2027.
Marrëveshja Roaming i hap rrugë nisjes së procesit për heqjen e tarifës roaming mes vendeve të Bashkimit Evropian dhe Ballkanit Perëndimor.
Tarifa e “Roaming”-ut nënkupton telekomunikimin dhe shërbimin që qytetarët e përdorin në një shtet tjetër, nga një qendër e operatorit të telefonisë së lëvizshme.
Pas negociatash të gjata Komisioni Europian dhe RCC drejtuar nga Sekretarja e Përgjithshme, Majlinda Bregu kanë arritur marrëveshjen me operatorët e telefonisë celulare në Europë e Ballkan për uljen e tarifave roaming.
Ndërkohë që presidentja e Komisionit Evropian, Ursula von der Leyen, ka përshëndetur firmosjen e marrësveshjes së tarifave Roaming në Tiranë, duke e cilësuar atë si mundësi të shkëlqyer për njerëzit, bizneset dhe turizmin.
“Me marrëveshjen e sotme, operatorët e telekomit do të nisin uljen e tarifave të roamingut të të dhënave ndërmjet BE-së dhe Ballkanit Perëndimor, duke filluar nga viti i ardhshëm. Kjo është e mirë për biznesin dhe turizmin. Është gjithashtu një mënyrë e shkëlqyer për t’i afruar njerëzit”- shkroi Presidentja e Komisionit Europian Ursula Von Der Leyen në Twitter.
