Eksperimenti i dy laborantëve shqiptarë, për krijimin e pjesëve të nevojshme për modifikimin e ventilatorëve, që i shërbejnë pacientëve në gjendje të rëndë me COVID-19, ka rezultuar i suksesshëm.
Për nismën e ndërmarrë nga Besar Lalike dhe Eldian Cepele shkroi për herë të parë “Iconstyle.al” ditën e djeshme.
Iniciativa e tyre mund të ndryshojë gjithçka për pacientët në gjendje të rëndë, pasi prototipi i ndërtuar, mund të furnizojë me oksigjen dy pacientë njëherësh.
Laboratët shqiptarë kanë marrë udhëzime nga Bologna për ndërtimin e prototipit, të cilin e kanë realizuar me shpenzimet e veta.
Ata kërkojnë ndihmë nga profesionistët e tjerë të fushës, që t’i furnizojnë me rezinë.
Arritja u konfirmua edhe nga rektori i Universitetit të Mjekësisë, prof.dr. Arben Gjata dhe njëkohësisht kreu i task forcës COVID-19, në studion e emisionit “5 pyetje nga Babaramo”.
“Përshëndes dy djem, një nga Vlora një nga Kavaja që më kontaktuan pasi kishin parë një profesor në Itali që me një aparat mund të mbaheshin dy pacientë, patëm mundësi të lidhemi me miqtë italianë na e solli projektin, e derdhën atë tubin dhe sot e provuam dhe funksiononte, kjo na krijon mundësi të dyfishojmë kapacitetet, nuk do ta provojmë tani por në kushte ekstreme. Është një tub që të jep ajër, është një tub që del nga aparati dhe jep ajër për dy pacientë. Derisa e kanë bërë në Amerikë dhe në Itali, funksioni edhe këtu. I përshëndes dy djemtë se i bënë me shpenzimet e veta. Janë teknikë që kanë një laborator, dhe që kanë zemër dhe shpirt dhe ato pak para që kanë t’ia vendosin në dispozicion këtij vendi” tha Gjata.
Sipas shifrave jo zyrtare në vendin tonë janë 140 ventilatorë, ndërsa Ministrja e Shëndetësisë, Ogerta Manastirliu njoftoi ditën e djeshme se është gati kontrata për blerjen e 54 respiratorëve, ndërsa do të blihen edhe 100 të tjerë.
Në këto kushte eksperimenti i laborantëve është i një rëndësie të jashtëzakonshme, duke qenë se numri i ventilatorëve është i kufizuar.
Aktualisht në vendin tonë numërohen 104 raste me COVID-19, nga të cilët 4 viktima, 5 të shëruar, ndërsa 3 pacientë ndodhen në gjendje të rëndë të Infektivi.
