Shteti italian ka ndërmarrë një vendim në lidhje me lehtësimin e procedurave për marrjen e nënshtetësisë italiane nga katër në 3 vite.
Qeveria aktuale italiane ka modifikuar dekretet e fundit lidhur me sigurinë e rendin publik të miratuar në kohën kur Matteo Salvini (Sekretar i partisë ekstremiste të djathtë, Lega Nord) mbante postin e ministrit të Brendshëm.
Me ndryshimet e reja kohëzgjatja e ekzaminimit administrativ të kërkesës për marrjen e nënshtetësisë italiane ulet nga 48 muaj në 36 muaj. Deri më 4 tetor 2018 kjo procedurë zgjaste vetëm dy vite por me kërkesë të ministrit të Brendshëm në qeverinë Conte 1, Matteo Salvini, afati 2-vjeçar ishte mjaft i pakët për të analizuar të drejtën e natyralizuar të emigrantit për të marrë nënshtetësinë italiane.
Sipas ligjit në fuqi nënshtetësia italiane merret pas një rezidence 10-vjeçare me leje të rregullt qëndrimi në territorin italian e me përmbushjen e kërkesave të tjera ekonomiko-administrative të jetesës në Itali.
Ndryshimet e reja janë strukturuar në 12 nene që shumë shpejt priten të diskutohen e më pas të aprovohen në Parlamentin italian.
