I dërguari i BE-së për bisedimet Kosovë-Serbi, Miroslav Lajçak është shprehur se marrëdhëniet mes dy vendeve janë drejt normalizimit.
Këtë deklaratë e bëri në Prishtinë pas takimeve me udhëheqësit e Kosovës. Ai u shpreh se takim me kryeministrin Kurti është diskutuar për sulmin e 24 shtatorit në Banjskë dhe vendimin e Bankës Qendrore të Kosovës për dinarin serb.
“Duke ju falënderuar dialogut ne kemi arritur rezultate në fund të vitit të kaluar. Marrëveshja për energjinë dhe njohja e targave të makinave janë prova konkrete por ka pasur pak përparim në pamjen e gjerë të normalizimit të marrëdhënieve. Ne kemi marrëveshjen e shkurtit dhe marsit të vitit të kaluar që do të thotë se nuk ka më nevojë të shtrohet pyetja se çfarë duhet bërë, madje ne nuk kemi nevojë të pyesim vetën se si ta bëjmë por pyetja është se kur të zbatohet dhe nëse pyetem unë, do të thosha sa më shpejt që është e mundur”, tha ai.
Lajçak tha se do t’i njoftojë vendet anëtare dhe udhëheqësit evropianë dhe do të përgatitë hapat e ardhshëm në procesin e dialogut Kosovë-Serbi.
Ai tha se në Bashkimin Evropian dhe Shtetet e Bashkuara gjatë këtij viti vëmendja do të jetë e përqendruar në proceset zgjedhore, “prandaj unë udhëtova dje në Beograd dhe sot në Prishtinë për procesin e normalizimit të marrëdhënieve ndërmjet Kosovës dhe Serbisë, për të kuptuar ku jemi në këtë proces dhe për të diskutuar sa përparim do të mund të arrijmë para zgjedhjeve”.
I dërguari i Bashkimit Evropian për bisedimet Kosovë-Serbi, Miroslav Lajçak tha të martën se me gjithë fillimin e zbatimit të marrëveshjeve për energjinë dhe targat e makinave, procesi i dialogut në pamje të gjerë ka shënuar përparim të paktë drejt normalizimit të marrëdhënieve ndërmjet dy vendeve.
