Përfaqësuesi i Bashkimit Europian për dialogun Kosovë-Serbi Mirosalv Lajçak paralajmëroi se nuk do të ketë një marrëveshje përfundimtare midis dy vendeve nëse nuk zbatohet marrëveshja për Asociacionin e Komunave me shumicë serbe.
Deklarata e Lajçak u bë pas përfundimit të vizitës së tij dyditore në Prishtinë në kuadër të vijimit të dialogut midis dy vendeve.
“Nëse nuk ka marrëveshje nuk do të ketë normalizim të marrëdhënieve. Dhe nuk do të ketë marrëveshje pa Asociacionin. Kosova e ka marrë përsipër zotimin, e ka nënshkruar. Asociacioni është pjesë e procesit, është pjesë e dialogut. Ne nuk kërkojmë të rihapin tekstin, por duam vetëm të implementojnë atë që e kanë nënshkruar”, theksoi Lajçak.
Lajçak i bëri thirrje spektrit politik të Kosovës për kompromis.
“Dialogu është jashtëzakonisht i rëndësishëm për të ardhmen evropiane të Kosovës. Dialogu i ofron Kosovës një mundësi për të diskutuar për të gjitha çështjet e pazgjidhura me Beogradin. Dialogu duhet t’i mbyllë të gjitha çështjet e hapura, por në të njëjtën kohë duhet të jetë e qartë se çdo marrëveshje mund të jetë vetëm rezultat i një kompromisi. Unë u bëra thirrje bashkëbiseduesve që të jenë të gatshëm për kompromis” nënvizoi përfaqësuesi i BE-së.
Kryeministri i Kosovës Avdullah Hoti qartësoi pas takimit me Lajçak se pa një marrëveshje përfundimtare midis dy vendeve për njohje reciproke, nuk ka formim të Asociacionit të komunave me shumicë serbe.
Marrëveshja për Asociacionin e Komunave me shumicë serbe midis Kosovës dhe Serbisë u arrit në Bruksel në vitin 2013.
Por marrëveshja në fjalë u rrëzua nga Gjykata Kushtetuese e Kosovës e cila konstatoi se disa prej pikave të marrëveshjes nuk janë në përputhshmëri me Kushtetutën e vendit.
/Gazetareforma.com/
