E hoqën nga puna në verë se zona e tij ishte mbushur me kanabis, sot e emëruan në krye të komisariatit të Shkodrës. Bëhet fjalë për Paulin Çupin, i cili për disa vite me radhë ka drejtuar Komisariatin e Policisë së Vaut të Dejës.
Protesta
Ai është emëruar ditën e sotme në këtë detyrë dhe po në të njëjtën ditë i është dashur të përballet menjëherë me një protestë. Protesta u agravua nga disa të rinj adoleshentë që dogjën selinë e PS-së dhe asnjë nuk ndërhyri gjatë kësaj kohe. Ish-kryeministri Sali Berisha dhe eksponentë të shumtë të PD-së kanë denoncuar anëtare të PS-së se e kanë inskenuar vetë djegien e selisë së PS-së në Shkodër.
Selia e PS-së u dogj dhe u bastis nga një grup minorenësh mesditën e sotme, ndërkohë që për rreth një orë asnjë efektiv policie nuk u duk që të neutralizonte situatën që ishte krijuar në mes të qytetit. Çupi është parë në krye të uniformave blu në terren, në shoqërinë e drejtuesve të tjerë të policisë së Shkodrës. Sakaq kryebashkiakja Voltana Ademi ka denoncuar në prokurorinë e drejtuesit e policisë së shtetit, pasi sipas saj policia ndenji me duar në xhepa, duke parë dhunimin e selisë, pa bërë asnjë veprim.
Pse e shkarkuan?
Burime bëjnë të ditur se arsyeja e largimit të numrit 1 të Policisë në Vau Dejës lidhen me betejën ndaj kanabisit. Në këtë zonë janë evidentuar rreth 30 mijë rrënjë hashash në afërsi të Komanit, njësia administrative Temal dhe nga ana e Policisë nuk ka pasur asnjë sinjalizim për këtë parcelë.
/GazetaReforma.com/
