Një ngjarje tragjike ka ndodhur dje në Selanik, ku një 53-vjeçar ka plagosur për vdekje bashkëshorten e tij me thikë.
Pas këtij akti të rëndë, ai ka vendosur t’i japë fund jetës duke u hedhur nga ballkoni i banesës, ku ka ndërruar jetë gjatë rrugës për në spital.
Sipas raportimeve nga mediat greke, para se të humbte jetën, gruaja, e plagosur rëndë, ka arritur të dalë në ballkon, por është futur përsëri në banesë nga burri i saj, i cili e ka goditur disa herë me thikë në bark dhe qafë.
Viktima ka humbur jetën nga gjakderdhja masive.
Çifti kishte dy fëmijë, 16 dhe 21 vjeç, të cilët nuk ndodheshin në banesë gjatë ngjarjes. Vajza e mitur ishte në shkollë.
Fqinjët e çiftit kanë shprehur habi, pasi ata i përshkruanin si një familje të qetë dhe pa probleme të dukshme. Nuk kishte pasur asnjë denoncim të dhunës në familje më parë.
Një mikesha e viktimës ka thënë se ajo ishte një grua e jashtëzakonshme dhe kujdesej për fëmijët e saj, duke shtuar se kishte përmendur disa herë probleme me burrin, por pa dhënë detaje të tjera.
