Ky është jahti që u përdor nga një rrjet kontrabande për të transportuar ilegalisht emigrantë drejt Britanisë së Madhe, sipas autoriteteve britanike.
Anija, me kapacitet për 23 pasagjerë, dyshohet se u nis nga Bresti i Francës dhe u ndalua në Kanalin Anglez gjatë rrugës për në Newquay, në jug të Anglisë.
Gjatë kontrollit nga oficerët e Forcave Kufitare, nën kuvertën e jahtit u gjetën 20 persona të fshehur të gjithë të dyshuar si shtetas shqiptarë. Mes tyre ishin 19 burra dhe një grua, të cilët janë ndaluar dhe pritet të deportohen.
Autoritetet kanë ngritur akuza ndaj disa prej të përfshirëve. Bleda Bega, 44 vjeçe, është akuzuar për ndihmë në kalimin e paligjshëm të kufirit.
Dy shtetas të tjerë shqiptarë, Florjand Lika, 30 vjeç, dhe Romeo Zani, 32 vjeç, përballen me akuza për shkelje të urdhrave të dëbimit.
Lika dhe Zani pranuan fajësinë më 15 prill në Gjykatën e Magjistraturës Bodmin dhe janë dërguar në paraburgim, në pritje të seancës së dënimit në Gjykatën e Lartë në Truro muajin e ardhshëm.
