Ish-kryeministri Sali Berisha ka mbetur jashtë grupit parlamentar të Partisë Demokratike. Kuvendi ka njohur kërkesën e PD për mos ta patur Berishën pjesë të grupit, pasi u përjashtua me herët nga kryedemokrati Lulzim Basha.
Ndër të tjera, rregullorja e Kuvendit parashikon se një deputet që largohet nga grupi parlamentar, mund t’i bashkohet një grupi tjetër gjashtë muaj nga data e largimit.
“Brenda 3 ditëve nga data e zgjedhjes së Kryetarit të Kuvendit, çdo deputet deklaron me shkrim se në cilin grup parlamentar bën pjesë. Deputetët që zgjidhen gjatë legjislaturës, e bëjnë deklarimin brenda 3 ditëve nga kryerja e betimit. Për krijimin e një grupi parlamentar kërkohet një minimum prej 7 deputetësh. Çdo deputet mund të jetë anëtar vetëm i një grupi parlamentar. Një deputet që largohet nga grupi parlamentar, mund t’i bashkohet një grupi tjetër parlamentar vetëm pas gjashtë muajve nga data e largimit. Çdo grup parlamentar, në mbledhjen e tij të parë, zgjedh kryesinë e tij”, thuhet në rregullore.
Kujtojmë që kreu i PD, Lulzim Basha e përjashtoi ish-kryeministrin Sali Berisha nga grupi parlamentar, deri në sqarimin e plotë të shpalljes së tij “non-grata” nga SHBA. Berisha e ka kundërshtuar hapur vendimin, duke thënë se Basha bashkërendoi forcat me Edi Ramën kundër tij.
