Është mbyllur mbledhja e Kryesisë së Partisë Demokratike, pas 6 orësh diskutime në selinë blu.
Në një prononcim për shtyp, kryedemokrati Lulzim Basha tha se Kuvendi Kombëtar do të mbahet në 18 dhjetor.
Kreu i Pd theksoi se nuk do lejojë askënd që ta marrë peng PD-në, ndërsa falënderoi të gjithë anëtarët e kryesisë për përkushtimin dhë legjitimimin e plotë të besimit që i kanë dhënë demokratët.
“Kuvendi do mbahet në 18 dhjetor dhe jam krenar për vendimin e kryesisë pas 6 orësh diskutime. Dua t’i falënderoj të gjithë pavarësisht prej vendimeve dhe votës së tyre për përkushtimin dhe legjitimimin e plotë të besimit që i kanë dhënë demokratët. E sigurtë është që nuk do lejoj askënd ta mbajë PD-në peng”, tha Basha.
Përmendim që ish kreu historik i PD-së, Sali Berisha ka dalë në një konferencë për media, pasi Kryedemokrati Basha vendosi që të thërrasë Kuvendin Kombëtar të Partisë Demokratike më 18 dhjetor, fiks një javë nga data që ka deklaruar ish-kryeministri Sali Berisha, 11 dhjetor.
Berisha i bëri thirrje Kryeministrit Rama të heqë dorë, pasi sipas tij të dy janë të dy bashkë kundër PD-së.
Kujtojmë se, 4200 firmat e delegatëve të nevojshme për thirrjen e Kuvendit Kombëtar u dërguan të mërkurën, në selinë e Partisë Demokratike dhe u depozituan në zyrën e kryetarit të Këshillit Kombëtar, Edi Paloka, i cili gjithashtu është shfaqur si përkrahës i lëvizjes së ndërmarrë nga Berisha.
