Kuvendi tërhiqet nga vendimi, për hapjen e vendeve vakante në KLP dhe KLGJ. Parlamenti ka anuluar sot thirrjen e kandidatëve për Kashillin e Lartë Gjyqësor.
Vendimi titullohet: Për revokimin e vendimit nr. 1, datë 08.10.2020, “Për shpalljen e vendeve vakante nga kandidatët nga trupa e pedagogëve të fakulteteve të drejtësisë dhe të shkollës së magjistraturës për anëtarët e Këshillit të Lartë Gjyqësor dhe Këshillit të Lartë të Prokurorisë”.
Kjo ka ndodhur pasi dje të dyja institucionet morën vendimin se mandatet e dy anëtarëve të Këshillit të Lartë Gjyqësor dhe të Këshillit të Lartë të Prokurorisë, nuk përfundojnë në shkurt të 2021, sikurse kishte përllogaritur Kuvendi.
Në njoftimet përkatëse të dyja institucionet bënë me dije se mandatet për to mbarojnë në dhjetor të vitit të ardhshëm, kohë kur mbushen plot tri vite nga dita kur këto institucione nisën nga puna.
Kuvendi hapi garën për zëvendësimin e Gent Ibrahimit e Sandër Beçit në KLP dhe të Erjon Muharremit e Maksim Qokut në KLGJ.
Ndërkaq, Presidenti i dërgon Këshillit të Emërimeve në Drejtësi listën e re me 10 kandidatë me qëllim plotësimin e vakancës së krijuar në Gjykatën Kushtetuese, për plotësimin e vendit vakant të ish-gjyqtarit Besnik Imeraj.
Pas përfundimit të afatit të rishpalljes për aplikim për këtë vend vakant (14.10.2020), rezulton se për plotësimin e këtij vendi vakant kanë aplikuar dhe kanë shprehur interesin shtetasit e mëposhtëm:
- Z.Aleksadër Toma
- Z.Altin Binaj
- Znj.Aldona Sylaj
- Znj.Ardita Buna (Alsula)
- Z.Eugen Papandile
- Z.Ilir Haznedari
- Z.Klajdi Mone
- Znj.Orkida Totojani
- Z.Përparim Kalo
- Z.Shaqir Hasanaj
GazetaReforma.com
