Gjykata Kushtetuese ka lënë në fuqi pezullimin e zv.kryeministres dhe ministres së Energjisë dhe Infrastrukturës, Belinda Balluku. Pas rreth 10 orësh mbledhje në dhomë këshillimi, trupa gjykuese nuk arriti të marrë një vendim përfundimtar mbi kërkesën e paraqitur nga qeveria, për shkak të ndarjes së votave në mënyrë të barabartë.
Sipas vendimit të shpallur nga kryetarja e Gjykatës Kushtetuese, Fiona Papajorgji, kërkesa nuk arriti kuorumin e nevojshëm prej pesë votash. Nga tetë anëtarët e pranishëm, katër votuan në favor të kërkesës së paraqitur nga kryeministri Edi Rama dhe katër në favor të qëndrimit të SPAK. Për pasojë, Gjykata Kushtetuese nuk mori vendim dhe mbetën në fuqi masat e vendosura më herët nga GJKKO.
Çështja ishte shqyrtuar nga Gjykata Kushtetuese në tre seanca radhazi, ku qeveria kishte kundërshtuar vendimin e GJKKO dhe SPAK për pezullimin e Ballukut nga funksionet publike. Mosarritja e kuorumit solli rrëzimin praktik të kërkesës së qeverisë dhe rikthimin e masës së pezullimit nga detyra për zv.kryeministren.
Belinda Balluku është marrë e pandehur në lidhje me tenderin me vlerë 190 milionë euro për ndërtimin e Tuneli i Llogarasë, për të cilin akuzat i janë komunikuar zyrtarisht. Ajo dyshohet gjithashtu edhe për tenderin 20 milionë euro të lotit 4 të Unaza e Madhe e Tiranës. Sipas SPAK, për të dyja procedurat, me vlerë totale 210 milionë euro, Balluku dyshohet se ka paracaktuar fituesit përmes mbikëqyrjes dhe ndërhyrjes gjatë gjithë procesit të zhvillimit të garës.
Me këtë vendim, i cili hyn në fuqi pas botimit në Fletoren Zyrtare, pezullimi i Belinda Ballukut nga funksionet publike mbetet në fuqi.
