Gjykata Kushtetuese e Shqipërisë ka rrëzuar kërkesën e Partisë Demokratike për pezullimin e ligjit për tatimin e profesionistëve të lirë, pas një seance që zgjati për rreth 7 orë. Seanca përfshinte shqyrtimin e katër padive të bashkuara, të cilat kërkojnë shfuqizimin e ligjit “Për tatimin mbi të ardhurat”, i cili nisi zbatimin për profesionet e lira nga 1 janari i këtij viti.
Palët paditëse, përfshirë jo më pak se një e pesta e deputetëve të Kuvendit të Shqipërisë, Shoqatën e “Institutit të Kontabilistëve të Miratuar” (IKM), Shoqatën e “Institutit të Ekspertëve Kontabël të Autorizuar” (IEKA) dhe Dhomën e Avokatisë së Shqipërisë, argumentojnë se ligji është diskriminues, rëndon shtresën e mesme dhe nuk është në përputhje me Kushtetutën. Ata theksojnë se tatimi i profesionistëve ka mbyllur qindra biznese dhe do të shtrenjtojë shërbimet që ofrojnë.
Deputetja e Partisë Demokratike, Jorida Tabaku, deklaroi se ligji “taton trurin” dhe godet shtresën e mesme, duke krijuar efekte të padëshiruara si krijimi i skemave fiktive për shmangien e tatimeve. Tabaku argumentoi se ky ligj ka diskriminuar të vetëpunësuarit duke i vendosur një barrë ekstra dhe duke rënduar më shumë barrën e tyre ekonomike.
Në anën tjetër, përfaqësuesja e Kuvendit, Mimoza Arbri, argumentoi se pezullimi i ligjit do të sillte probleme në buxhetin e shtetit dhe humbjen e lehtësive ligjore për grupe të caktuara të sipërmarrjes. Arbri theksoi se afati i zbatimit të ligjit ka nisur dhe ka patur efektet e tij të para, duke përfshirë të ardhurat që mblidhen nga kjo taksë në planifikimin vjetor.
Gjykata Kushtetuese i ka dhënë afat palëve të sjellin argumente shtesë deri më 21 qershor, ndërsa vendimi final do të merret më 25 qershor. Ky vendim pritet të ketë ndikim të madh në profesionistët e lirë dhe në zhvillimet e ardhshme ekonomike dhe ligjore në Shqipëri.
