Gjykata Kushtetuese ka vendosur me shumicë votash se vendimi i qeverisë për mbylljen e platformës TikTok cenon lirinë e shprehjes dhe lirinë e shtypit. Vendimi u mor pas kërkesës së paraqitur nga Asociacioni i Gazetarëve të Shqipërisë dhe qendra “Rrjeti Ballkanik për Gazetarinë Investigative, Shqipëri” (BIRN), të cilat kundërshtuan vendimin e Këshillit të Ministrave nr. 151, datë 06.03.2025 për marrjen e masave të përkohshme ndaj platformës online TikTok.
Në njoftimin e vendimmarrjes, Gjykata Kushtetuese bën të ditur se shqyrtoi pretendimet e palëve në lidhje me përputhshmërinë e këtij vendimi me Kushtetutën e Republikës së Shqipërisë dhe me Konventën Europiane për të Drejtat e Njeriut. Sipas gjykatës, kërkuesit legjitimohen të kërkojnë shqyrtimin e çështjes pasi pretendimet lidhen drejtpërdrejt me ushtrimin e lirisë së gazetarëve dhe të mediave.
Gjykata vlerësoi se ndërhyrja e shtetit në aksesin ndaj platformës TikTok përbën kufizim të lirisë së shprehjes dhe të shtypit, ndaj duhej të analizohej nëse ky kufizim ishte i ligjshëm, i justifikuar nga interesi publik dhe proporcional me qëllimin që synonte të arrinte.
Në analizën e saj, Gjykata Kushtetuese thekson se edhe pse mbrojtja e të miturve dhe e të rinjve nga ndikimet negative të rrjeteve sociale përbën një interes publik të rëndësishëm, masa e vendosur nga qeveria nuk përmbush kriterin e proporcionalitetit. Sipas gjykatës, bllokimi i përgjithshëm i një platforme nuk është domosdoshmërisht mjeti i vetëm apo më efektiv për të arritur këtë objektiv.
Gjykata vlerësoi se nuk u provua se autoritetet kishin shqyrtuar mjete të tjera më pak kufizuese për të arritur qëllimin e mbrojtjes së të miturve. Po ashtu, fakti që masa ishte cilësuar si e përkohshme nuk mjafton për ta bërë atë proporcionale, sidomos kur zhvillimet teknologjike të platformave janë të shpejta dhe kufizimi mund të ketë pasoja të gjera në komunikimin publik.
Në vendim theksohet gjithashtu se ligjet ekzistuese që rregullojnë komunikimet elektronike nuk i japin Këshillit të Ministrave autorizim të qartë dhe të parashikueshëm për të vendosur një bllokim të përgjithshëm të një platforme online për të gjithë përdoruesit në territorin e Shqipërisë. Për këtë arsye, sipas Gjykatës, kriteri që kufizimi të jetë “vetëm me ligj” nuk është përmbushur.
Gjykata rrëzoi pretendimin për cenim të lirisë së veprimtarisë ekonomike, duke vlerësuar se kërkuesit nuk arritën të provojnë një lidhje të drejtpërdrejtë mes vendimit të qeverisë dhe dëmit ekonomik të pretenduar.
Megjithatë, për sa i përket lirisë së shprehjes dhe lirisë së shtypit, gjykata arriti në përfundimin se ndërhyrja nuk përmbush kriterin e proporcionalitetit të parashikuar nga neni 17 i Kushtetutës. Për këtë arsye, kjo pjesë e kërkesës u pranua dhe u konstatua cenimi i këtyre lirive.
Gjykata thekson gjithashtu se edhe pse vendimi i qeverisë nr. 151/2025 nuk është më në fuqi për shkak të zëvendësimit me një vendim tjetër të mëvonshëm, çështja paraqet interes publik dhe meriton shqyrtim në themel.
Vendimi përfundimtar i arsyetuar i Gjykatës Kushtetuese pritet të shpallet brenda afateve ligjore të parashikuara nga ligji për organizimin dhe funksionimin e kësaj gjykate.
