Ditën e sotme Autoriteti Portual i Durrësit ka dalë në një njoftim ku lajmëron të gjithë pasagjerët që kanë rezervuar bileta për në Bari, Itali se për shkak të kushteve të vështira të motit, nisja nga porti i Durrësit do të bëhet disa orë më vonesë.
Po ashtu lajmërohet se kompanitë e lundrimeve do të respektojnë të gjitha detyrimet që lindin nga kjo vonesë.
“Njoftojmë të gjithë pasagjerët që kanë rezervuar biletat për të lundruar me traget mbrëmjen e sotme drejt Barit(Itali) se për shkak të kushteve të vështira të motit, nisja nga Porti i Durrësit do të bëhet me disa orë vonesë.
Kompanitë e lundrimeve do të respektojnë të gjitha detyrimet që lindin nga kjo vonesë, prandaj për çdo informacion mund të kontaktoni me to.
Ju falenderojmë për mirëkuptimin dhe sapo të kemi një njoftim për normalizimin e situatës, do e bëjmë të ditur në vijim”, thuhet në njoftimin zyrtar të Autoritetit Portual i Durrësit.
Vlen të theksojmë se kushtet e paqëndrueshme atmosferike kanë qenë prezente në vendin tonë, duke sjellë vranësira të shpeshat të cilat gjenerojnë herë pas here reshje të pakta shiu. Sipas MeteoAlb, temperaturat e ajrit u rritën në mëngjes dhe në mesditë duke luhatur vlerat ditore nga 5°C deri në 20°C.
Era fryu mesatare dhe e fortë me shpejtësi 60 km/h kryesisht nga drejtimi Jugor duke krijuar në brigjet detare dallgëzim mbi 5 ballë.
