Ministrja e Arsimit Rinis dhe Sportit, Evis Kushi ka mirëpritur Zëvendësministren e re Bora Muzhaqi, gjatë një takimi të zhvilluar me përfaqësues të drejtorive të ndryshme në këtë ministri.
Gjatë takimit të zhvilluar ministrja Kushi ka falenderuar znj. Aspasjana Kongo, për angazhimin e saj të deritanishëm në Ministrinë e Arsimit Sporteve dhe Rinisë, si dhe për kontributin në projekte dhe iniciativa konkrete.
Evis Kushi ka uruar mirëseardhjen dhe shumë suksese Zv.ministres së re, Znj. Bora Muzhaqi, e cila do të jetë e angazhuar të ndjek nga afër çështjet që kanë të bëjnë me fushën e Rinisë.
Gjithashtu Kushi është shprehur se ka shumë besim që me energjinë dhe pasionin për të punuar do të avancoj shumë në favor të të rinjve.
“Kam besim që me energjinë dhe pasionin e saj për të punuar në favor të të rinjve do të avancojmë akoma më shumë me programe e projekte të frytshme së bashku” – nënvizon Ministrja Kushi në statusin e saj në Facebook.
Kujtojmë se kur ka kaluar jo më shumë se një javë nga zgjedhjet e 25 prillit, kryeministri Edi Rama ka bërë ndryshime në qeveri. Në detyrë janë emëruar dy zëvendës ministre të reja, konkretisht Bora Muzhaqi dhe Dallëndyshe Bici. E para është emëruar zv.ministre e Arsimit, duke zëvendësuar në këtë detyrë Aspasjana Kongon. Në zgjedhjet e 25 prillit Bora Muzhaqi ishte kandidate për deputete në radhët e Partisë Socialiste dhe ishte renditur në vendin e 31-të në listën e Tiranës. Po ashtu, Muzhaqit iu besua edhe pozicioni i zëdhënëses së fushatës në selinë rozë.
